Metro Plus: Cyfnewidfa Dociau’r Barri

Mae gan Ganolfan Drafnidiaeth y Barri y potensial i ddenu buddsoddiad economaidd newydd i Chwarter yr Orsaf, ac i ganol y dref a’r ardal o’i hamgylch, gyda datblygiadau’n cynnwys cymdogaethau defnydd cymysg ac adeiladau amlswyddogaethol o fewn ychydig gannoedd o fetrau i’r orsaf. Ceir y posibilrwydd o ymgorffori llety o safon, sy’n ddeniadol i weithwyr proffesiynol ifanc, yng nghanol y dref, ac o ddatblygu unedau manwerthu sy’n addas ar gyfer entrepreneuriaid, busnesau bach, a busnesau sydd ar gychwyn. Y gobaith yw y byddai’r cynllun yn arwain at newid trawsnewidiol ar gyfer y Barri trwy wella’r cysylltedd â chanol y dref ac ag ardaloedd eraill. Ynghlwm wrth hwn y mae’r posibilrwydd o ddenu mwy o bobl i’r dref i ymweld â hi, ac i weithio, buddsoddi a byw ynddi, gan arwain at gynnydd yn nifer yr ymwelwyr a gallu’r dref i ddenu buddsoddiad, gan greu swyddi a chartrefi. Ceir potensial hefyd i greu pwynt cyrraedd modern, sydd wedi’i ddylunio’n dda, sy’n croesawu ymwelwyr, pobl fusnes a thrigolion, gan ddarparu profiad uchel ei safon.

Byddai gan Ganolfan Drafnidiaeth y Barri rywfaint o botensial hefyd i fynd i’r afael â heriau lleol, trwy gyflwyno cyfleoedd cyflogaeth drwy ddarparu trafnidiaeth well, a thrwy wella iechyd y boblogaeth os bydd y cynllun yn gallu cefnogi dulliau cynaliadwy o deithio a theithio llesol.

Awgryma adroddiad gan yr Urban Transport Group fod gan drafnidiaeth ran bwysig i’w chwarae wrth fynd i’r afael â’r heriau canlynol, yn enwedig mewn trefi ôl-ddiwydiannol fel y Barri:

• Cyflogau isel a thlodi mewn gwaith
• Diweithdra a diffyg gwytnwch mewn economïau lleol
• Cyrhaeddiad addysgol isel a lefelau sgiliau isel
• Cynhyrchiant isel
• Anawsterau wrth ddenu mentrau newydd, a’r canfyddiad ei bod wedi’i gadael ar ôl
• Cafnu strydoedd mawr
• Tanfuddsoddi mewn seilwaith a’r stoc dai
• Poblogaethau sy’n heneiddio

Byddai’r gyfnewidfa fysiau’n cynnwys 4-5 o gilfachau bws a lle ar gyfer tacsis, a byddai’n ymestyn y safle parcio a theithio sy’n gweithredu ar ei eithaf neu’r tu hwnt iddo ar hyn o bryd. Mae’r rhaglen reilffyrdd bresennol yn cynnwys capasiti ychwanegol ar hyd y rheilffordd, a, cyn y pandemig COVID-19, roedd pob safle parcio a theithio yn y Barri yn gweithio ar ei eithaf neu’r tu hwnt iddo. Mae’n fwriad adfywio i gynnwys darpariaeth aml-ddefnydd rhwng y ddau leoliad a nodwyd ar hyd coridor y rheilffordd, ac mae cynnig Targedu Buddsoddiad mewn Adfywio wedi’i gyflwyno ar gyfer sicrhau’r ddarpariaeth hon. Gallai darparu gwasanaeth bysiau o ogledd i de’r Barri, a fyddai’n cysylltu â’r rheilffordd, leihau’r tagfeydd ar hyd coridor Port Road / Croes Cwrlwys a choridor Dinas Powys. Câi mannau gwefru trydanol eu cynnwys fel rhan o’r prosiect a gyflwynir.